मोतियाविन्दुले गुमेको आँखाको ज्योति फर्के पछि

स्थानीय तह

गृहपृष्ठ
स्थानीय तह
मोतियाविन्दुले गुमेको आँखाको ज्योति फर्के पछि

माेतियाविन्दु मोतियाविन्दुले गुमेको आँखाको ज्योति फर्के पछि

मंगलबार, असोज ९, २०८० अनिष विष्ट

मोतियाविन्दुको दुवै आँखाको सल्याक्रिया पछि चिचिला गाउँपालिका–४ कि भद्रमाया गुरुङ । अनिष विष्ट/ खाँदबारी

खाँदबारी । चिचिला गाउँपालिका–४ की भद्रमाया गुरुङले पाँच महिना देखि दुवै आँखा देख्न छाडिन् । ८३ वर्षिय गुरुङ उमेरकै कारण आँखा देख्न छाडेको भन्दै उनि घरमै परिवारको सहयोगमा भित्रबाहिर गर्ने गर्थिन् ।
‘बुढेसकालको कारण आँखा देख्न छाडेको र अब उपचार हुन्छ भनेर मलाई विश्वास लागेकै थिएन’ गुरुङले भनिन् । गुरुङको मोतियाविन्दुका कारण दुबै आँखाको ज्योति गुमेको थियो । दुई वर्ष अगाडिबाट नै दुबै आँखा कम देख्न थालेकी थिन्, बैशाख देखि पुरै बन्द भयो । शरीर कमजोर हुँदै जादा आँखा कमजोर हुनु स्वभाविक नै लाग्थ्यो उनलाई । ‘भतिजो र छोरीले खाँदबारीमा आँखा शिविर छ, आँखा उपचार गर्न जानुपर्छ भन्दा मैले अब बुढेसकालमा कसरी आँखा देख्छु भनेर जान्न भनेको थिए्’ गुरुङले भनिन् । तर सबैले कर गरेपछि गाडि चढेर उनिहरुकै सहारामा आएर उपचार पछि अहिले दुवै आँखा देख्न सक्ने भए । तेजरत्न आँखा तथा कान उपचार केन्द्र खाँदबारीको आयोजनामा भएको मोतियाविन्दुको शल्याक्रिया शिविरमा गुरुङको मोतियाविन्दुको शल्याक्रिया भएको हो ।
आइतबार दायाँ आँखाको उपचार गर्दा सम्म विश्वास नै लागेको थिएन उनलाई । तर उपचार पछि पट्टी लगाएर बन्द राखेको आँखा भोलिपल्ट खोल्दा उज्यालो देख्न पाउँदा उनको खुशीको सिमा नै रहेन । बाँचुन्जेल अब अन्धकारमा बस्नु पर्दा किन बाँचीरहेको होला जस्तो लाग्ने गुरुङले पहिले कै अवस्थामा देख्न पाउँदा खुशी नहुने कुरै भएन । दायाँ आँखा देख्न सुरु गरेपछि दोस्रो दिनको शिविरमा गुरुङको बायाँ आँखाको शल्याक्रिया भयो । सल्याक्रिया पछि मंगलबार विहानै गुरुङको बायाँ आँखाको पट्टी तेजरत्न आँखा तथा कान उपचार केन्द्रका इन्र्चाज क्षितिज बरालले खोल्दा उनि अझ खुशी भइन् । उनले सबैलाई धन्यवाद दिदै भनिन्, फेरी आँखा देख्छु जस्तो लागे कै थिए । हरेक कुरामा परिवारको भरपर्नु पर्दा उनलाई धेरै चिन्ता हुने गरेको थियो । ‘हामी बुढो भएपनि आँखा बुढो नहुँदो रहेछ, उपचार पाए जहिल्यै आँखा देख्न सकिने रहेछ’ गुरुङले भनिन् । एक वर्ष देखिनै लौरोको सहारामा रहेकी गुरुङ पाँच महिना देखि अन्धकारमा जीवन विताउँदै आएकी थिइन् । दुबै आँखा देख्न सक्ने भएपछि आफै हिडेर गाडी भएको ठाउँ सम्म उनि पुगिन् । धेरै महिना पछि आफै हिड्न सक्दा एकछिन त उनको खुट्टा समेत लर्वरायो । उमेरले पाको भएपनि उनमा हिड्न सक्ने आँट भने हराएको छैन ।
उनको भतिजो छोरो बुद्धि बहादुर गुरुङले भने–‘काकी आमाले आँखा देख्न छाडेपछि ट्वाइलेट जान सम्म समस्या भएको थियो ।’ उहाँ तन्दुरुस्तै भएपनि आँखा नदेपछि थलामै हुनुहुन्थ्यो । गाउँघरमा खेतिका लागि हामी बाहिर जाँदा पनि आमालाई एक्लै छाडेर जान गाह्रो हुन्थ्यो । हिडडुल गर्न सक्दासक्दै आँखा देख्न छाडेपछि आमाको स्याहार गर्न एक जना चाहिन थालेको उनले बताए । आमाको उपचारका लागि बाहिर लानु परेको भए उपचार गर्न लैजाने हाम्रो हैसियत थिए । तर जिल्लामा निशुल्क शिविर सञ्चालन भएकाले आमाले बुढेसकालमा पनि आँखा देख्न सक्नुभयो । भद्रमाया भतिजो छोरो सँग बस्दै आएकी छन् । मोतियाविन्दुको समयमा नै सल्याक्रिया भयो भने कसैले पनि आँखाको ज्योति गुमाउनु नपर्ने डाक्टर विवेक आचार्यले बताए । समयमा उपचार नपाए सदाका लागि ज्योति गुम्ने उनको भनाई छ । आँखा धमिलो हुन साथ स्वास्थ्य संस्थामा गएर आँखाको जाँच गराउन उनले अनुरोध गरे ।
तेजरत्न आँखा तथा कान उपचार केन्द्रमा खाँदबारीले आइतबार र सोमबार निशुल्क मोतियाविन्दुको शल्याक्रिया शिविर सञ्चालन गरेको हो । शिविरमा सङ्खुवासभा र भोजपुरको उत्तरी क्षेत्रका ३९ जनाको शल्याक्रिया भएको उपचार केन्द्रका इन्चार्ज क्षितिज बरालले जानकारी दिए । लाहान आँखा अस्पतालका डाक्टर विवेक आचार्यले मोतियाविन्दुको शल्याक्रिया गरेका थिए । यस उपचार केन्द्रले वार्षिक ८ वटा मोतियाविन्दुको निशुल्क सल्याक्रिया शिविर सञ्चाल गर्दै आएको तेजरत्न आँखा तथा कान उपचार केन्द्रका अध्यक्ष अनन्त कुमार गौलीले बताए । यहाँको दुर्गम क्षेत्रबाट सदरमुकाम खाँदबारी आइपुग्न नै ४÷५ दिन लाग्छ काठमाण्डौं गएर आँखाको उपचार गराउनु त यहाँका लागि निकै महंगो पर्दछ । ‘त्यसैले हामीले वार्षिक रुपमा विरामी छनौट गर्दै जिल्लाका विभिन्न स्थानमा निशुल्क मोतियाविन्दुको शल्याक्रिया शिविर सञ्चालन गर्ने गरेका छौ ।’ अध्यक्ष गौलीले भने । जिल्लामा बार्षिक चार सय जना भन्दा बढीको शिविरमा आँखाको शल्याक्रिया हुँदै आएको उनले बताए । अहिले सम्मका सबै शल्याक्रिया सफल भएकाले उपचार गराउने संख्यामा वृद्धि हुँदै गएको उनको भनाई छ । यस उपचार केन्द्रमा सङ्खुवासभाका मात्र नभएर भोजपुरको उत्तरी क्षेत्रका विरामी समेत आउने गरेको उनले बताए ।

प्रकाशित मिति: मंगलबार, असोज ९, २०८० ०५:५५

प्रतिक्रिया दिनुहोस्