सङ्खुवासभामा मनोसामाजिक परामर्श सेवालाई प्रभावकारी बनाइने

समाज

गृहपृष्ठ
समाज
सङ्खुवासभामा मनोसामाजिक परामर्श सेवालाई प्रभावकारी बनाइने

सङ्खुवासभामा मनोसामाजिक परामर्श सेवालाई प्रभावकारी बनाइने

मंगलबार, भदौ २, २०८३ अरूण सन्देश

खाँदबारी । सङ्खुवासभामा मनोसामाजिक परामर्श सेवालाई थप प्रभावकारी बनाउने उद्देश्यले जिल्ला समन्वय समितिको आयोजनामा मनोसामाजिक परामर्शसम्बन्धी ६ महिने तालिम प्राप्त परामर्शकर्ताहरू बीच मंगलबार अन्तरक्रिया तथा छलफल सम्पन्न भएको छ।
जिल्ला समन्वय समिति सङ्खुवासभाका प्रमुख सुमन शाक्यको अध्यक्षतामा सम्पन्न बैठकमा जिल्लामा कार्यरत मनोसामाजिक परामर्शकर्ताहरू तथा सरोकारवालाहरूको सहभागिता रहेको थियो। बैठकमा मनोसामाजिक परामर्शका क्षेत्रमा कार्यरत जनशक्तिले आ–आफ्नो कार्यक्षेत्रमा भोगेका अनुभव तथा समस्याबारे छलफल गरेका थिए।
बैठकले जिल्लामा मनोसामाजिक परामर्श सेवालाई समन्वयात्मक र प्रभावकारी रूपमा सञ्चालन गर्न तीन महत्वपूर्ण निर्णय गरेको छ। जिल्लामा मनोसामाजिक परामर्शका क्षेत्रमा कार्यरत परामर्शकर्ताहरूबीच कार्यक्षेत्रका अनुभव आदान–प्रदान तथा नियमित अन्तरक्रिया गर्ने निर्णय गरिएको छ। आगामी तीन–तीन महिनामा जिल्ला समन्वय समितिको कार्यालयमा अन्तरक्रिया कार्यक्रम आयोजना गरी मनोसामाजिक परामर्श सेवाको अवस्था, चुनौती तथा उपलब्धिबारे छलफल गर्ने निर्णय गरिएको छ। जिल्लामा कार्यरत मनोसामाजिक परामर्शकर्ताहरूले आपसी समन्वय र सहकार्य गर्दै सुरक्षित आप्रवासन कार्यक्रम अन्तर्गत कार्यक्रम नभएका स्थानीय तहहरूमा समेत मनोसामाजिक परामर्श सेवा प्रदान गर्न आवश्यक सहयोग गर्ने निर्णय गरिएको छ।
बैठकमा जिल्ला समन्वय समितिका प्रमुख सुमन शाक्य, उपप्रमुख कविता खत्री अधिकारी, निमित्त जिल्ला समन्वय अधिकारी शुक्रादेवी राईको सहभागिता रहेको थियो । त्यसैगरी मनोसामाजिक परामर्शकताहरु सङ्खुवासभा अस्पतालकी वरिष्ठ नर्सिङ अधिकृत सुधा घिमिरे, खाँदबारी नगरपालिकाका रेनुका सुनाम, चैनपुर नगरपालिकाका मिनेश रोक्का, भोटखोला गाउँपालिकाका छिटिक भोटे, सुरक्षित आवासगृह तथा पुनःस्थापना केन्द्रका तुलसी घिमिरे, पत्रकार तथा मनोसामाजिक परामर्शकता अनिष विष्टको उपस्थीति रहेको थियो ।
मानसिक स्वास्थ्यसम्बन्धी समस्या बढ्दै गइरहेको अवस्थामा स्थानीय तहसम्म मनोसामाजिक परामर्श सेवा विस्तार गर्न र उपलब्ध जनशक्तिबीच नियमित समन्वय कायम गर्न बैठकका निर्णय महत्वपूर्ण हुने अपेक्षा गरिएको छ।
मनोसामाजिक परामर्शलाई समुदायस्तरमा विस्तार गर्ने उद्देश्यले खाँदबारी नगरपालिका, चैनपुर नगरपालिका, धर्मदेवि नगरपालिका र भोटखोला गाउँपालिकामा मनोसामाजिक परामर्श परिचालन भइरहेका छन्।

प्रकाशित मिति: मंगलबार, भदौ २, २०८३ १६:५९

प्रतिक्रिया दिनुहोस्