संखुवासभा : संखुवासभाको खाँदबारी नगरपालिका–१ ढोलबाजेमा ट्याक्टरको ठक्करबाट एकजनाको मृत्यु भएको छ।
ट्याक्टरको ठक्करबाट खाँदबारी नगरपालिका–१ ढोलबाजेका ६३ वर्षीय यज्ञबहादुर तामाङको मृत्यु भएको जिल्ला प्रहरी कार्यालय संखुवासभाका प्रहरी निरीक्षक भुवनबाबु खड्काले जानकारी दिए।
शुक्रबार बिहान २ त ३२१६ नम्बरको ट्याक्टरको ठक्करबाट घाइते भएका तामाङको उपचारका क्रममा जिल्ला अस्पतालमा बिहान १० बजे मृत्यु भएको प्रहरी निरीक्षक खड्काले बताए।
ट्याक्टर चालक मकालु गाउँपालिका–१ का २४ वर्षीय तीर्थसिंह तामाङ फरार रहेको जिल्ला प्रहरी कार्यालयले जनाएको छ। ट्याक्टर चालक तामाङको खोजी भइरहेको प्रहरीले जनाएको छ।
