खाँदबारीमा अत्याधुनिक सिनेमा हल, ‘रमिताको पिरती’ हाउसफुलसँगै भव्य सुरुवात

मनोरञ्जन

गृहपृष्ठ
मनोरञ्जन
खाँदबारीमा अत्याधुनिक सिनेमा हल, ‘रमिताको पिरती’ हाउसफुलसँगै भव्य सुरुवात

खाँदबारीमा अत्याधुनिक सिनेमा हल, ‘रमिताको पिरती’ हाउसफुलसँगै भव्य सुरुवात

शनिबार, माघ २४, २०८२ अरूण सन्देश

'परान' हेर्दै दर्शक ।

सङ्खुवासभा सदरमुकाम खाँदबारीमा जिएसएफ सिनेमा हल सञ्चालनमा आएको छ। खाँदबारीको बुद्धचोकमा अवस्थित अत्याधुनिक, सुविधासम्पन्न तथा अन्तर्राष्ट्रिय स्तरको सिनेमा हल शनिबारदेखि औपचारिक रूपमा सञ्चालनमा ल्याइएको हो।
जिएसएफ सिनेमा प्रालिले सञ्चालनमा ल्याएको उक्त सिनेमा हलमा पहिलो दिन चार शो प्रदर्शन गरिएको थियो। उद्घाटनकै दिन प्रदर्शन गरिएको चलचित्र ‘रमिताको पिरती’ हाउसफुल भएको छ। खाँदबारीमा सिनेमा हल सञ्चालनमा आएको पहिलो दिनमै दर्शकको पूर्ण साथ पाएको हलका म्यानेजिङ डाइरेक्टर राजिव श्रेष्ठले जानकारी दिए।
सुदीप्ता निर्देशित यो चलचित्र रोमान्टिक ड्रामा विधामा निर्माण गरिएको हो। चलचित्रमा नायिका आना शर्माले शीर्ष भूमिका निर्वाह गरेकी छन्। उनी चलचित्रकी कार्यकारी निर्माता पनि हुन्। आना शर्मासँगै गायक समीर श्रेष्ठ, नायक धीरज मगर र विनय श्रेष्ठले मुख्य भूमिका निभाएका छन्। चलचित्रको रनटाइम ११५ मिनेट रहेको छ।
सिनेमा हलमा बिहान, दिउँसो र साँझ गरी दैनिक चार शो सञ्चालन हुँदै आएको छ। हाल हलमा ‘कुमारी’, ‘परान’ र ‘रमिताको पिरती’ प्रदर्शन भइरहेको छ। टिकट शुल्क २५० रुपैयाँ तोकिएको छ। ‘कुमारी’ र ‘रमिताको पिरती’ माघ २३ गते रिलिज भएका चलचित्र हुन् भने ‘परान’ सय दिन मनाउन सफल चलचित्र हो। दिनेश राउत निर्देशित रोमान्टिक चलचित्र ‘कुमारी’ अहिले यसमा समावेश गीतका कारण चर्चामा छ। यसै चलचित्रमार्फत आकृति राजभण्डारी र अभिषेक खड्काले मुख्य भुमिकामा डेब्यु गरेका छन्। जेनजी पुस्ताका दुई कलाकारलाई डेब्यू गराएर निर्देशक राउतले दर्शकमाझ नयाँ अनुहारलाई प्रस्तुत गरेका छन् । चलचित्रको रनटाइम १२७ मिनेट छ ।
ठूलो पर्दामा चलचित्र हेर्दा केही समयका लागि वास्तविक संसारबाट अलग अनुभूति हुने र जीवन तथा कामको तनावबाट क्षणिक राहत मिल्ने म्यानेजिङ डाइरेक्टर श्रेष्ठले बताए। उनका अनुसार अब सङ्खुवासभा र भोजपुरका उत्तरी क्षेत्रका दर्शकले मनपर्ने चलचित्र हेर्न धरान वा इटहरीसम्म जानुपर्ने बाध्यता अन्त्य भएको छ। सिनेमा हल सञ्चालनसँगै खाँदबारीको व्यावसायिक चहलपहल बढ्ने अपेक्षा गरिएको छ।

प्रकाशित मिति: शनिबार, माघ २४, २०८२ २२:२९

प्रतिक्रिया दिनुहोस्