सङ्खुवासभाका १२ सहकारी निष्क्रिय, ३५ दिनभित्र विवरण बुझाउन निर्देशन

अर्थतन्त्र

गृहपृष्ठ
अर्थतन्त्र
सङ्खुवासभाका १२ सहकारी निष्क्रिय, ३५ दिनभित्र विवरण बुझाउन निर्देशन

सङ्खुवासभाका १२ सहकारी निष्क्रिय, ३५ दिनभित्र विवरण बुझाउन निर्देशन

बुधबार, साउन २७, २०८३ अरूण सन्देश

खाँदबारी । कोशी प्रदेश सरकार, उद्योग, कृषि तथा सहकारी मन्त्रालयअन्तर्गत प्रदेश सहकारी रजिष्ट्रार तथा प्रशिक्षण कार्यालयले सङ्खुवासभाका १२ वटा सहकारी संघ–संस्थालाई निष्क्रिय सहकारीको सूचीमा राख्दै आवश्यक विवरण बुझाउन निर्देशन दिएको छ।
प्रदेश सहकारी ऐन, २०७६ को दफा ६० को उपदफा (१) बमोजिम बुझाउनुपर्ने विवरण लगातार दुई आर्थिक वर्षसम्म नबुझाएका सहकारी संघ–संस्थालाई कार्यालयले सार्वजनिक सूचना जारी गर्दै विवरण पेश गर्न भनेको हो। कार्यालयले जारी गरी सङ्खुवासभाका विभिन्न स्थानीय तहमा रहेका सहकारीहरूको नाम सार्वजनिक गरेको हो।
सूचीमा सिलिचोङ गाउँपालिकाको अणोदय बहुउद्देश्यीय सहकारी संस्था लिमिटेड, पाँचखपन नगरपालिकाको बुकुरचुङ बहुउद्देश्यीय सहकारी संस्था लिमिटेड, धर्मदेवी नगरपालिकाका चापे दुग्ध उत्पादक सहकारी संस्था लिमिटेड र तिनजुरे बचत तथा ऋण सहकारी संस्था लिमिटेड रहेका छन्।
त्यस्तै, खाँदबारी नगरपालिकाका जिल्ला जडीबुटी सहकारी संघ लिमिटेड, हिमालयन कृषि सहकारी संस्था लिमिटेड, जिल्ला सहकारी संघ लिमिटेड, मंगला देवी बहुउद्देश्यीय सहकारी संस्था लिमिटेड, जिल्ला बहुउद्देश्यीय सहकारी संघ लिमिटेड र महिला उद्यम अल्लो सहकारी संस्था लिमिटेड गरी ६ वटा सहकारी सूचीमा परेका छन्।
यसैगरी चैनपुर नगरपालिकाको सिद्धकाली बहुउद्देश्यीय सहकारी संस्था लिमिटेड र चिचिला गाउँपालिकाको हिमालयन किसान अर्थोडक्स चिया उत्पादक सहकारी संस्था लिमिटेड पनि निष्क्रिय सहकारीको सूचीमा राखिएका छन्।
कार्यालयले सार्वजनिक सूचनामा सूची प्रकाशित भएको मितिले ३५ दिनभित्र तोकिएका कागजातसहित कार्यालयमा अधावधिक गराउन जानकारी गराएको छ। तोकिएको अवधिभित्र विवरण पेश नगरेमा सहकारी ऐन तथा नियमावलीअनुसार हुने कारबाहीसमेत व्यहोर्नुपर्ने कार्यालयले जनाएको छ।
कार्यालयले माग गरेका विवरणमा हालसम्म नबुझाएका वार्षिक प्रतिवेदन तथा लेखापरीक्षण प्रतिवेदन, वार्षिक कार्यक्रम तथा नीति–योजना, खुद बचतसम्बन्धी नीति तथा योजना, सञ्चालकहरूको नाम, ठेगाना सहितको विवरण, साधारणसभाको बैठक सम्बन्धी जानकारी, शेयर सदस्य संख्या तथा शेयर पुँजीको विवरण, सञ्चालक वा सदस्यहरूले लिएको ऋणमध्ये तिर्न बाँकी रकम, विभिन्न कोषमा जम्मा रहेको रकम, वार्षिक रूपमा लगानी गर्न सकिने ऋणको अधिकतम सीमा, सहकारी रजिष्ट्रारले समय–समयमा तोकेका अन्य विवरण तथा सञ्चालक, लेखा र व्यवस्थापकको सम्पत्ति विवरण रहेका छन्।
प्रदेश सहकारी रजिष्ट्रार तथा प्रशिक्षण कार्यालयले सहकारी संस्थाहरूलाई नियमित रूपमा आवश्यक विवरण अद्यावधिक तथा पेश गर्नसमेत आग्रह गरेको छ।

प्रकाशित मिति: बुधबार, साउन २७, २०८३ १२:३१

प्रतिक्रिया दिनुहोस्