सङ्खुवासभाका साढे ७ हजार बालबालिकालाई पोलियो विरुद्धको खोप लगाइँदै

समाज

गृहपृष्ठ
समाज
सङ्खुवासभाका साढे ७ हजार बालबालिकालाई पोलियो विरुद्धको खोप लगाइँदै

पोलियो विरुद्धको खोप सङ्खुवासभाका साढे ७ हजार बालबालिकालाई पोलियो विरुद्धको खोप लगाइँदै

शनिबार, जेठ ५, २०८१ अरूण सन्देश

खाँदबारी । सङखुवासभाका करिव साढे सात हजार बालबालिकालाई जेठको दोस्रो साता देखि पोलियो विरुद्धको आइपीभी खोप लगाउने तयारी गरिएको छ । स्वास्थ्य कार्यालय सङ्खुवासभाले पत्रकार तथा जिल्ला खोप समन्वय समिति सँग अन्तरक्रिया कार्यक्रम गर्दै नियमित पोलियो खोप लगाउन छुटेका बालबालिकालाई खोप दिने तयारी भइरहेको जानकारी दिएको हो । सरकारले बालबालिकालाई पोलियो रोगविरुद्धको खोप अभियान मार्फत २०७३ देखि ०७५ सालसम्म खोप लागाउन छुटेका बालबालिकालाई खोप लागाउन लागिएको हो ।
आगामी जेठ १३ गतेदेखि पोलियो रोगविरुद्धको खोप ‘आइपिभी’ अभियान सञ्चालन गर्ने भएको हो । यसअघि खोप लगाउन छुटेका बालबालिकाले अभियानमा खोप लगाउन पाउनेछन् । स्वास्थ्य कार्यालयका अनुसार अनुसार विसं २०७३ वैशाख देखि २०७५ असोज सम्म जन्मिएका बालबालिकालाई उक्त खोप लगाउन लागिएको हो । पोलियो विरुद्ध ०७१ सालदेखि नेपालमा खोप लगाउन सुरु गरिए पनि २०७३ देखि २०७५ सालसम्म खोप उपलब्ध नभएकाले नेपालभरिका बालबालिका उक्त खोपबाट बञ्चित भएकाले यस पटक खोप अभियान सञ्चालन गरिएको स्वास्थ्य कार्यालय प्रमुख नारद सुवेदीले बताए । सन् २०१६ देखि २०१८ को बीचमा उक्त ‘आइपिभी’ खोप उत्पादन हुन नसकेपछि ती उमेर समूहका बालबालिका खोप लगाउनबाट छुटेका थिए ।
विभिन्न खाेप केन्द्रहरुमा जेठको १३ देखि १७ गतेसम्म खोप लगाइने छ । जसका लागि जिल्लाका ३ सय १३ वटा खोप केन्द्र निर्धारण गरिएको स्वास्थ्य कार्यालय सङ्खुवासभाका प्रवत्ता रोशन श्रेष्ठले जानकारी गराए । जिल्लाको १० वटा स्थानीय २ सय ७४ विद्यालय र ३९ वटा स्वास्थ्य केन्द्रमा खोप केन्द्र रहेछन् । खोप अभियानका लागि ३ सय १३ खोप कार्यकर्ता, ६ सय २६ स्वयंसेवक र ९६ जना स्थानीय सुपरिवेक्षक परिचालन गरिने छ । जिल्लामा ७ हजार ४ सय ५७ जना बालबालिका आईपीभी खोप लगाउन छुटेको प्रवत्ता श्रेष्ठले बताए । सबै भन्दा धेरै खाँदबारी नगरपालिकामा २ हजार ९९ जना बालबालिका खोप लगाउन छुटेका हुन् ।
नियमिततर्फ पोलियोविरुद्ध छ हप्ता, १० हप्ता र १४ हप्ताका बालबालिकालाई मुखबाट थोपा तथा १४ हप्ता र नौ महिनासम्मका बालबालिकालाई खोप लगाइन्छ । सरकारले सन् २०२६ सम्म पोलियो उन्मूलन गर्ने लक्ष्य राखेको छ । पोलियो भएकामध्ये ३ प्रतिशतलाई पक्षघात हुने र त्यसको उपचार नभएकाले संक्रमण हुनबाट जोगाउन बालबालिकालाई खोप दिने गरिन्छ ।
खोप अभियानमा छुटेका सबै बालबालिकालाई खोप लगाउन जिल्ला समन्यवय समिति प्रमुख तथा खोप समन्वय समिति प्रमखु सुमन शाक्ले अनुरोध गरे । खोप अभियान कार्यक्रम सरकारको प्राथमिकताको कार्यक्रम भएकाले यस अभियानलाई प्रभावकारी बनाउनु सबैको दायित्व रहेको प्रमुख शाक्यले बताए ।

प्रकाशित मिति: शनिबार, जेठ ५, २०८१ १३:५३

#पोलियो विरुद्धको खोप

प्रतिक्रिया दिनुहोस्