कर्म–ज्यामु भोटिया फाउन्डेसन नेपालको १३औँ वार्षिक साधारणसभा सम्पन्न

समाज

गृहपृष्ठ
समाज
कर्म–ज्यामु भोटिया फाउन्डेसन नेपालको १३औँ वार्षिक साधारणसभा सम्पन्न

कर्म–ज्यामु भोटिया फाउन्डेसन नेपालको १३औँ वार्षिक साधारणसभा सम्पन्न

शुक्रबार, भदौ १२, २०८३ अरूण सन्देश

काठमाडौं । कर्म–ज्यामु भोटिया फाउन्डेसन नेपालको १३औँ वार्षिक साधारणसभा सम्पन्न भएको छ। फाउन्डेसनले संखुवासभाको भोटखोला गाउँपालिकामा सञ्चालन गर्दै आएको संस्कृति, शिक्षा, वातावरण तथा विकास परियोजना अन्तर्गतका कार्यक्रम, वार्षिक प्रगति, आर्थिक प्रतिवेदन तथा आगामी कार्ययोजनामाथि साधारणसभामा छलफल गरिएको हो।
साधारणसभामा फाउन्डेसनका अध्यक्ष साङबु नुप्पा भोटेको अध्यक्षतामा विभिन्न प्रस्तावमाथि छलफल गरी निर्णयहरू पारित गरिएको जनाइएको छ। सभामा अघिल्लो आर्थिक वर्षमा संस्थाले सञ्चालन गरेका कार्यक्रम तथा उपलब्धिहरूको समीक्षा गर्दै आगामी वर्षका कार्यक्रमलाई थप प्रभावकारी बनाउने विषयमा जोड दिइएको थियो।
फाउन्डेसनका अनुसार परियोजना अन्तर्गत भोटखोला गाउँपालिकामा झयाम्बे भुची (शिशु स्याहार केन्द्र) सञ्चालन, बाल सुरक्षा तथा संरक्षणसम्बन्धी तालिम, सामुदायिक पुस्तकालय व्यवस्थापन, खानेपानी मुहान तथा ट्याङ्की निर्माण/मर्मत, सीपमूलक च्याउ खेती तालिम, छात्रवृत्ति वितरण, कफी ब्यारिस्टा तथा सिलाइ–बुनाइ तालिम र आर्चरीलगायत परम्परागत खेलकुद प्रवर्द्धनका कार्यक्रम सञ्चालन भएका छन्।
परियोजनाअन्तर्गत भोटखोलामा पाँच वटा शिशु स्याहार केन्द्र सञ्चालन गरी प्रत्यक्ष रूपमा करिब ५५ जना बालबालिकाले सेवा प्राप्त गरेका छन्। त्यस्तै, खाँदबारीमा बाल सुरक्षा तथा संरक्षणसम्बन्धी तालिम सञ्चालन गरी शिक्षक, सहजकर्ता, बोर्ड सदस्य तथा कर्मचारी सहित १५ जनालाई प्रशिक्षण दिइएको छ।
अरुणोदय उच्च माध्यमिक विद्यालय लिङ्गमा पुस्तकालय व्यवस्थापन तथा सहयोगीको तलब/भत्ता निरन्तरताबाट १७६ जना प्रत्यक्ष र ६५५ जना अप्रत्यक्ष लाभान्वित भएको प्रतिवेदनमा उल्लेख छ। भोटखोला–२ थाङ्मुछयीमा २० हजार लिटर क्षमताको खानेपानी ट्याङ्की निर्माण सम्पन्न भई घरधुरी, विद्यालय, गुम्बा तथा स्वास्थ्य चौकी लाभान्वित भएका छन्।
त्यसैगरी, २५ घरधुरीलाई लक्षित गरी सातदिने च्याउ खेती तालिम तथा उन्नत च्याउको बीउ र प्लास्टिक सामग्री वितरण गरिएको छ। स्थानीय महिला तथा युवतीलाई लक्षित गरी कफी बरिष्ठा र सिलाइ–बुनाइसम्बन्धी सीपमूलक तालिम पनि सञ्चालन गरिएको फाउन्डेसनले जनाएको छ।
फाउन्डेसनले प्रवर्द्धन गरेको आर्चरी खेलमा सहभागी खेलाडीहरूले प्रदेशस्तरीय प्रतियोगितामा स्वर्ण पदकसमेत प्राप्त गरेको प्रतिवेदनमा उल्लेख छ। यसलाई संस्थाको महत्वपूर्ण उपलब्धिका रूपमा प्रस्तुत गरिएको छ।
साधारणसभाले वार्षिक प्रगति प्रतिवेदन तथा आर्थिक प्रतिवेदन स्वीकृत गर्नुका साथै आगामी कार्यक्रम तथा कार्ययोजनालाई अघि बढाउने निर्णय गरेको छ। साथै संस्थाको आर्थिक वर्ष २०८२/०८३ को लेखापरीक्षणका लागि लेखापरीक्षक नियुक्त गर्ने निर्णयसमेत गरिएको छ।
सभामा फाउन्डेसनको आगामी कार्ययोजना, परियोजनाको निरन्तरता, संस्थागत विकास तथा समुदायमा आधारित कार्यक्रमलाई थप प्रभावकारी बनाउने विषयमा समेत छलफल भएको थियो।
फाउन्डेसनका अध्यक्ष साड्डु नुप्पा भोटेले संस्था स्थापना भएदेखि नै भोटखोलाको शिक्षा, संस्कृति, वातावरण र विकासका क्षेत्रमा निरन्तर काम गर्दै आएको बताउँदै आगामी दिनमा पनि स्थानीय समुदायको आवश्यकता र सहभागितालाई प्राथमिकतामा राखेर कार्यक्रम सञ्चालन गर्ने प्रतिबद्धता व्यक्त गरे।
साधारणसभाले रसुवा, भोटेकोशी लगायतकाे क्षेत्रमा भएकाे महा-विनाशकारी प्राकृतिक प्रकोपमा प्रभावित उद्धार, राहात तथा सहायता गर्ने निर्णय गरेकाे छ ।

प्रकाशित मिति: शुक्रबार, भदौ १२, २०८३ १४:४०

प्रतिक्रिया दिनुहोस्