संङ्खुवासभाबाटै पेन्सन पट्टा वितरण सुरु, सेवाग्राही उत्साहित

समाज

गृहपृष्ठ
समाज
संङ्खुवासभाबाटै पेन्सन पट्टा वितरण सुरु, सेवाग्राही उत्साहित

संङ्खुवासभाबाटै पेन्सन पट्टा वितरण सुरु, सेवाग्राही उत्साहित

शुक्रबार, चैत २०, २०८२ अरूण सन्देश

तस्विर : अनिष विष्ट

खाँदबारी । कोष तथा लेखा नियन्त्रक कार्यालय (कोलेनिका) सङ्खुवासभाले सेवा निवृत्त कर्मचारीका लागि पेन्सन पट्टा वितरण कार्य सुरु गरेको छ। यससँगै अब सेवा निवृत्त कर्मचारीले काठमाडौं धाउनुपर्ने बाध्यता हटेको छ।

कार्यालयले सेवा निवृत्त कर्मचारी रुद्र बुढाथोकीलाई पहिलो सेवाग्राहीका रूपमा पेन्सन पट्टा हस्तान्तरण गरेको हो। कोलेनिका सङ्खुवासभाका कोष नियन्त्रक चिरञ्जीवि अधिकारीले बुढाथोकीलाई पट्टा हस्तान्तरण गरेका हुन्।

यसअघि निजामती सेवाबाट अवकाश वा राजीनामा दिएका कर्मचारीहरूले पेन्सन पट्टा बनाउन राष्ट्रिय किताबखाना पुलचोक र पेन्सन कार्यालय त्रिपुरेश्वर पुग्नुपर्ने, जसका लागि २–४ दिन समय र अतिरिक्त खर्च लाग्ने गरेको थियो। तर, अब “इ–पेन्सन सेवा” मार्फत जिल्लाबाटै सेवा सुरु भएपछि प्रक्रिया सहज बनेको कोष नियन्त्रक अधिकारीले जानकारी दिए।

उनका अनुसार अवकाश वा राजीनामा स्वीकृत भएका कर्मचारीहरूको पेन्सन पट्टा अब डिजिटल प्रणालीमार्फत तयार हुने छ। सेवा निवृत्त भएपछि कर्मचारीले आवश्यक कागजात कोलेनिका कार्यालयमा पेश गरेपछि उक्त विवरण अनलाइन प्रणालीमा अपलोड गरिनेछ। त्यसपछि सम्बन्धित कार्यालयबाट हस्ताक्षरित पट्टा कोलेनिकामा पठाइने र सेवाग्राहीलाई हस्तान्तरण गरिने व्यवस्था गरिएको छ।

जिल्लाबाटै सेवा प्राप्त गर्न पाएपछि निकै सहज भएको सेवा निवृत्त कर्मचारी रुद्र बुढाथोकीले बताए। उनले भने, “अब काठमाडौँ जानु नपर्ने भयो, त्यहाँ बस्दा लाग्ने खर्च पनि बचत भयो।” छोटो समयमा पहिलो सेवाग्राहीका रूपमा सेवा लिन पाउँदा आफू अत्यन्त खुसी भएको उनले बताए। यस नयाँ प्रणालीले जिल्लास्तरमै छिटो, सस्तो र प्रभावकारी सेवा प्रवाहमा सहयोग पुग्ने विश्वास गरिएको छ।

प्रकाशित मिति: शुक्रबार, चैत २०, २०८२ २१:०३

प्रतिक्रिया दिनुहोस्