हिमालय मावि खाँदबारीमा दुईदिने विज्ञान कार्यशाला सुरु

समाज

गृहपृष्ठ
समाज
हिमालय मावि खाँदबारीमा दुईदिने विज्ञान कार्यशाला सुरु

हिमालय मावि खाँदबारीमा दुईदिने विज्ञान कार्यशाला सुरु

शनिबार, असार ६, २०८३ अरूण सन्देश

खाँदबारी । सङ्खुवासभाको खाँदबारी स्थित हिमालय माध्यमिक विद्यालय मा दुईदिने विज्ञान कार्यशाला सुरु भएको छ। असार ६ र ७ गते सञ्चालन हुने कार्यशालाको उद्घाटन जिल्ला समन्वय समितिका प्रमुखले गरेका हुन् ।
विद्यालय व्यवस्थापन समितिका अध्यक्ष निरञ्जन श्रेष्ठको सभापतित्वमा आयोजित कार्यक्रममा खाँदबारी नगरपालिकाभित्रका माध्यमिक तहमा विज्ञान तथा गणित विषय अध्यापन गराउने शिक्षकहरूको सहभागिता रहेको छ। कार्यक्रममा विद्यालयका प्रधानाध्यापक ताराबहादुर बुढाथोकीले कार्यशालाको उद्देश्यसहित स्वागत मन्तव्य व्यक्त गरेका थिए।
कार्यशालामा मोरङको सुकुना माध्यमिक विद्यालयका रोस्टर जिओलोजिस्ट डा. दिव्यराज दाहाल तथा झापाको हिमालय माध्यमिक विद्यालय दमकका विज्ञान संयोजक तथा फिजिसियन चूडामणि गुरागाईंले सहजीकरण गरिरहेका छन्। कार्यक्रममा अरुण उपत्यका क्षेत्रका आठ माध्यमिक विद्यालयका १६ जना विज्ञान शिक्षक सहभागी छन्।
विद्यालयले नेपाल सरकार, शिक्षा मन्त्रालय तथा शिक्षा तथा मानव स्रोत विकास केन्द्रअन्तर्गतको विज्ञान प्रवर्द्धन कार्यक्रममार्फत प्राप्त अनुदानबाट कार्यशालाको आयोजना गरेको जनाएको छ। कार्यक्रममा विद्यालय व्यवस्थापन समिति, शिक्षक अभिभावक संघका पदाधिकारी, विज्ञान अध्ययनरत विद्यार्थी तथा सरोकारवालाको समेत सहभागिता रहेको थियो। प्रधानाध्यापक बुढाथोकीका अनुसार कार्यशालामार्फत असल अभ्यासहरूको आदानप्रदान, समस्या पहिचान, समाधानका उपाय तथा प्रभावकारी कार्यान्वयन योजना निर्माण गरी विद्यालय विकास प्रस्तावसमेत तयार गरिनेछ। कार्यक्रममा प्रपअ पदमप्रसाद भण्डारी, शिक्षा विकास तथा समन्वय इकाइ प्रमुख गोपालमान भण्डारी तथा जिल्ला समन्वय समिति प्रमुख सुमन शाक्यले शुभकामना मन्तव्य व्यक्त गर्दै कार्यशालाको प्रशंसा गरेका थिए ।
सङ्खुवासभा र भोजपुरको अरुण उपत्यका क्षेत्रमा विज्ञान कक्षा सञ्चालन गर्ने सामुदायिक विद्यालयका रूपमा परिचित हिमालय माध्यमिक विद्यालयमा हाल करिब एक हाजार पाँच सय विद्यार्थी अध्ययनरत छन्। कक्षा ११ र १२ मा मात्रै ४५० भन्दा बढी विद्यार्थी अध्ययन गरिरहेका छन् भने विज्ञान विषय अध्ययन गर्ने विद्यार्थीको संख्या ६६ पुगेको विद्यालयले जनाएको छ।
विद्यालयमा वाणिज्य, शिक्षा, कम्प्युटर विज्ञान र विज्ञान विषयको अध्यापन हुँदै आएको छ। २०८२ सालको एसईई परीक्षामा विद्यालयबाट सहभागी एक विद्यार्थीले ४ जीपीए हासिल गरेको थियो भने कुल ८४.६ प्रतिशत विद्यार्थी उत्तीर्ण भएका थिए। यस्तै, २०८१ सालमा विज्ञान संकायतर्फ ५८ प्रतिशत नतिजा रहेकोमा २०८२ सालमा प्रकाशित नतिजाअनुसार विज्ञान समूहबाट ६१ प्रतिशत विद्यार्थी उत्तीर्ण भएका छन्।
सो अवसरमा विज्ञान संकायतर्फ कक्षा ११ मा प्रथम हुने स्मृति दुलाल र कक्षा १२ मा प्रथम हुने अनुस्का कार्कीलाई जनही २५ हजार रुपैयाँ नगद पुरस्कार प्रदान गरिएको छ ।

प्रकाशित मिति: शनिबार, असार ६, २०८३ २०:५७

प्रतिक्रिया दिनुहोस्