सङ्खुवासभामा दोस्रो आर्थिक गणना हुँदै

अर्थतन्त्र

गृहपृष्ठ
अर्थतन्त्र
सङ्खुवासभामा दोस्रो आर्थिक गणना हुँदै

सङ्खुवासभामा दोस्रो आर्थिक गणना हुँदै

बिहीबार, चैत ५, २०८२ अरूण सन्देश

खाँदबारी । राष्ट्रिय तथ्यांक कार्यालयले दोस्रो आर्थिक गणनाको तयारी थालेको छ। ‘अर्थतन्त्र मापनका लागि आर्थिक गणना’ भन्ने नारासहित चैत १ देखि असार मसान्तसम्म आर्थिक गणना गर्न लागेको हाे।
सङ्खुवासभामा आर्थिक गणनाका लागि जिल्ला आर्थिक गणना कार्यालय स्थापना भएकाे छ । दोस्रो आर्थिक गणनामा आर्थिक विवरणदेखि उद्योगहरूबाट भएको उत्पादनसम्मको विवरण समावेश गरिँदैछ। आर्थिक गणनामा प्रतिष्ठानहरूमा गएर नेपालमा उद्योगको अवस्था, रोजगारी सिर्जनाको अवस्था समेत हेरिनेछ। कार्यालयका अनुसार आर्थिक गणनाका लागि सङ्खुवासभामा ४ जना सुपरिवेक्षक र २८ जना गणकहरू नियुक्त हुँदैछन्। राष्ट्रिय आर्थिक गणनाबाट उद्योग, व्यापार, व्यवसाय, सेवा क्षेत्र, सहकारी तथा निजी–सार्वजनिक संस्थाहरूको संख्या, प्रकार, लगानी, रोजगारी, उत्पादन र सेवा प्रवाहसम्बन्धी विवरण संकलन गर्ने योजना रहेकाे जिल्ला आर्थिक गणना अधिकारी विशाल कुमार खड्रकाले जानकारी दिए । कार्यालयले विभिन्न १८ वटा क्षेत्रको आधारभूत विवरण संकलन गर्नेछ। आर्थिक कारोबार गर्ने क्षेत्रहरूको अवस्था जान्नका लागि यो गणना महत्वपूर्ण हुने खड्काले बताए। उनले भने, ‘खासगरी आर्थिक क्रियाकलाप गर्ने इकाइहरूको अवस्थाको पहिचान हुनेछ र सरकारलाई भावी कार्यदिशा निर्माणका लागि पनि मद्दत पुग्नेछ। मूल्यवृद्धि, रोजगारीको स्थिति, अवसरदेखि जनशक्तिको आवश्यकतादेखि भविष्यमा गर्ने तमाम कामका लागि आर्थिक गणनाले सूचना दिनेछ।’ वैशाख २०७५ मा पहिलो पटक आर्थिक गणना भएको थियो।
जिल्लाकाे आयुर्वेद स्वास्थ्य केन्द्रकाे भवनमा जिल्ला आर्थिक गणना कार्यालय स्थापना गरेर काम सुरू गरिएकाे छ।

प्रकाशित मिति: बिहीबार, चैत ५, २०८२ १९:३६

प्रतिक्रिया दिनुहोस्