५० शैयाको अस्पताल भवन हस्तान्तरण

अर्थतन्त्र

गृहपृष्ठ
अर्थतन्त्र
५० शैयाको अस्पताल भवन हस्तान्तरण

५० शैयाको अस्पताल भवन हस्तान्तरण

बुधबार, असार ११, २०८२ अरूण सन्देश

खाँदबारी । जिल्ला अस्पताल सङ्खुवासभालाई ५० शैयाको अस्पताल हस्तान्तरण भएको छ । सघन सहरी तथा भवन निर्माण आयोजना धनकुटाले जिल्ला अस्पताललाई सोमबार एक कार्यक्रम विच भवन हस्तान्तरण गरेको हो ।
२०७५ असार २२ गते बिकोई/स्वामीनारायण/आशीर्वाद जेभि सुनसरीसँग अस्पताल निर्माणका लागि ठेक्का सम्झौता भएको थियो । २०७८ असार २२ सम्ममा निर्माण सम्पन्न गर्नेगरी सम्झौता भएपनि निर्माण व्यवसायीले समयमा काम नसक्दा ४ पटक म्याद थप भएको थियो । अस्पताल भवन भ्याटसहित २७ करोड २७ लाख ८० हजार सात सय २३ रुपैयाँमा निर्माण सम्पन्न भएको सघन सहरी तथा भवन निर्माण आयोजनाका प्रमुख सुमनकुमार मिश्रले जानकारी दिए । यही असार १३ सम्ममा भवन निर्माण सम्पन्न गर्ने गरी अन्तिम पटक म्याद थप भएको थियो । अव अस्पताल सञ्चालनका लागि आवश्यकता अनुसार संरचना तयारी गरिने निर्माण व्यवसायीले जनाएको छ । अस्पतालको तीन वटा सुविधा सम्पन्न ब्लकहरु निर्माण सम्पन्न गरीएको आयोजना प्रमुख मिश्रले बताए ।
भवन हस्तान्तरण कार्यक्रममा जिल्ला समन्वय समितिका प्रमुख तथा अस्पताल विकास समितिका अध्यक्ष सुमन शाक्यले भवन बुझ्दै अब तत्कालै नयाँ भवनबाट सेवा सुरु गर्ने बताए । प्रमुख शाक्यले भने–‘सम्झौता र स्टमेट अनुसार निर्माण व्यवसायीले काम सम्पन्न गर्नुपर्ने तथा एक वर्ष आवश्यक मर्मत संभारको गर्नु पर्नेछ ।’ सघन सहरी तथा भवन हस्तान्तरण गरेको छ, अव हामी आवश्यक पुर्वाधार तयारी गरी नयाँ भवन बाटै सेवा प्रवाह सुरु गर्नेछौं । समन्वय प्रमुख शाक्यले भने । पर्याप्त भवन नहुँदा साँघुरो प्यासेजमा राखेर विरामीको उपचार गर्नुपर्ने बाध्यताको अव अन्त्य हुने उनले बताए । २०३३ सालमा निर्माण भएको १५ शैयाको पुरानो भवनको प्यासेज र भुईँमा राखेर बिरामीको उपचार भइरहेको थियो ।
जिल्ला अस्पतालमा हाडजोर्नी विशेषज्ञ सेवा, सामान्य शल्यक्रिया, फिजियोथेरापी, बालरोग लगायतका सेवा सञ्चालनमा रहेको छ । पर्याप्त भवन नहुँदा सेवा विस्तारमा समेत समस्या भएको थियो । अव थप सेवा समेत विस्तार गरिने समन्वय प्रमुख तथा अस्पताल विकास समिति अध्यक्ष शाक्यले बताए । जिल्ला अस्पतालमा जिल्लाका १० वटा स्थानीय तह सहित छिमेकी जिल्ला भोजपुरका आधाभन्दा बढी भागका सेवाग्राही जिल्ला अस्पताल आउने गरेका छन् ।

प्रकाशित मिति: बुधबार, असार ११, २०८२ १९:३०

प्रतिक्रिया दिनुहोस्